Li navçeya Cizîrê ya Şirnexê bi dirûşma “Rêbertiya Azad Civaka Demokratîk" pîrozbahiya Newrozê hat lidarxistin. Navnîşana pîrozbahiyê, Qada Bajar a li Taxa Konakê bû. Bi hezaran kes di saetên zû yên serê sibehê de Qada Newrozê tije kirin. Welatiyên ku bi cil û bergên xwe yên Kurdî beşdar bûn, gelek caran dirûşma “Bijî Serok Apo” berz kirin. Bi derketina ser dikê ya hunermend Rojdayê re coşa girseyê derket lûtkeyê. Bi deh hezaran kesan li ber stranan govend gerandin. 

 

Endama Meclisa Dayikên Aştiyê ya Şirnexê Hatîce Beytûr hêvî kir ku Newroz bibe wesîleya aştiyê û got: “Hêvîdarim ev Newroz bibe wesîleya aştî, azadiyê. Heke em tevek vê berpirsyartiyê li xwe bigirin, aştî nêz e.” Piştre jî Dayikên Aştiyê kevokên aştiyê firandin. Komîteya Amadekar a Newrozê jî gel silav kir û Newroza wan pîroz kir. 

 

Parlamenterê DEM Partiyê yê Şirnexê Mehmet Zekî Îrmez banga xwedîderketina li “Banga Aştî û Civaka Demokratîk” a Rêberê Gelê Kurd Abdullah Ocalan kir û got: “Ji vê saetê û şûnde tu kes nikare pêşiya azadiya gelê Kurd bigire. Em ê têkoşîna xwe mezin bikin û bi serkeftinê tacîdar bikin.” 

 

Cîgirê Hevserokê Giştî yê DBP’ê Huseyîn Bîrlîk jî got: “Bila îro birêz Ocalan dengê me li Îmraliyê bibihîse. Bi banga civaka demokratîk a di 27’ê Sibatê re birêz Ocalan firsendeke sedsalî afirand. Hûn îro bi herikîna qadê re xwedî li vê bangê derketin. Em bi gelê xwe, bi partiya xwe û bi Rêbertiya xwe bibawerin.” 

 

Piştre jî peyama girtiyan hate xwendin. 

 

'JIYANA AZAD TÊ VEHANDIN’

 

Hevşaredara Bajarê Mezin a Wanê Neslîhan Şedal jî anî ziman ku felsefeya “Jin, jiyan, azadî” li hemû cîhanê belav bûye û jinên cîhanê têkoşîna jinên Kurd bo xwe mînak digirin. Neslîhan Şedal, wiha domand: “Gelê me bi sala ye li dijî bêedaletiyê û zilmê li be xwe dide. Yek ji cihên li dijî vê bêedaletî û zilmê serî netewandî jî Cizîr e. Ev têkoşîn, bi ciwan û jinan dest pê kir. Bi Rahşan û Zekiyeyan dest pê kir. Îro çavê hemû cîhanê li têkoşîna gelê Kurd e. Di dîroka Newrozê de Cizîr xwedî cihekî cuda ye. Têkoşîna we îro pêl bi pêl li hemû cîhanê belav bûye.” 

 

'ÊRIŞAN BIDIN SEKINANDIN’

 

Wekîla DEM Partiyê Newroz Uysal Aslan jî got ku ji bo pêvajoya nû bigihije encamê divê Tirkiye êrişên xwe bide sekinandin û wiha pê de çû: “Li cîhanê û di dîroka Newrozan de cihê Cizîrê cuda ye. Bi saya têkoşîna we îro gelên me bi hev re Newroza xwe pîroz dike. Ji ber banga birêz Ocalan, wateya vê Newrozê cuda ye. Ji bo vekirina pêşiya civaka demokratîk û avakirina aştiyê, divê dewlet dev ji van êrişan berde. Heke demokrasî nebe aştî jî nayê, azadî jî nayê. Heke zimanê gelekî qedexe be, ew gel azad jî nîne.” 

 

'EM Ê BI HEV RE CIVAKA DEMOKRATÎK AVA BIKIN’ 

 

Endama MYK’a DEM Partiyê Elîf Bulut jî ev tişt anî ziman: “Agirê Newrozê ku em her roj li cihekî vêdixin, ji bo aştî û azadiyê vêdikeve. Me tu aran dev ji têkoşîn û berxwedana xwe berneda. Peyama birêz Ocalan li ber me rêyeke nû vekir. Em têkoşîna xwe ya hevpar di çarçoveya vê peyamê de dimeşînin. Birêz Ocalan 12 sal berê jî heman bang kiribû. Îro jî derdorên ku jiyaneke hevpar a Kurd û Tirkan qebûl nakin dê winda bikin. Duh li Stenbolê operasyonek hate kirin û Ekrem Îmamoglû hate binçavkirin. Heke em li dijî vê nesekinin, dê mekanîka derbeyê bidome. Têkoşîna me tu caran nesekinî û roj bi roj mezin dibe. Têkoşîna gelê Kurd a sed sal in didome bi têkoşîna gelan re bû yek. Em ê bi hev re civaka demokratîk ava bikin.” 

 

Piştî axaftinan, hunermend Rojda derket ser dikê. Girseyê li ber strana govend gerand. 

 

Pîrozbahî, bi derketina ser dikê ya Kasim Taşdogan û Şervan domiya.