BEDLÎS - Hevserokê Giştî yê DEM Partiyê Tuncer Bakirhan bertek nîşanî binçavkirina Ekrem Îmamoglû da û got: "Ev operasyona siyasî di heman demê de li dijî me hatiye kirin. Lihevkirina Bajar sûc nîne, modeleke demokratîk e.” 

 

Li navçeya Tetwanê ya Bedlîsê bi dirûşma “Rêbertiya Azad Civaka Demokratîk” Newroz hate pîrozkirin. Pîrozbahî, li Qada Fuarê hat lidarxistin û bi alên nivîsa “Newroza azadî” hate xemilandin. Welatiyan cil û bergên Kurdî li xwe kilrin û bi saetan li ber stranên Kurdî govend gerandin. Çalakvanan gelek caran dirûşma “Bijî Serok Apo” berz kirin. Pîrozbahî, bi rêzgirtinê dest pê kir. 

 

Hevserokê Giştî yê DEM Partiyê Tuncer Bakirhan di pîrozbahiyê de got ku Newroza 2025’an ji ber banga Rêberê Gelê Kurd Abdullah Ocalan pir girîng e û got: “Em, Newroza birêz Ocalan û girtiyên siyasî pîroz dikin.” Bakirhan, got: “Meşaleya azadiyê ya Kawayê Hesinkar vêxistî, bi banga birêz Ocalan re me û gelên herêmê ronî dike.” 

 

'OCALAN ROJHILATA NAVÎN RONÎ DIKE’ 

 

Bi domdarî Bakirhan got ku Abdullah Ocalan di heman demê de banga xwe ji bo xelkê Tetwanê kiriye û wiha pê de çû: “Kedkarên herî mezin ên aştiyê hûn in. Hûn hene lewma banga dîrokî ya 27’ê Adarê hate kirin. We dev jê berneda lewma birêz Ocalan got ‘civaka demokratîk.’ Birêz Ocalan Tirkiyeyeke ku Kurd, Tirk, Elewî, jin û kedkar tê de wekhev û azad dijîn dixwaze. Gelo hûn jî bi vê bangê re ne? Birêz Ocalan mîna Kawayê Hesinkar, mîna Mazlum Dogan gelê Kurd û gelên Rojhilata Navîn ronî dike. 

 

Ev bang dê tenê bi Kurdan nede qezenckirin, dê bi hemû gelên Tirkiyeyê bide qezenckirin. Lewma em dibêjin divê cidî nêz bibin. Divê îktîdar û dewlet pêdiviyên vê bangê cîbicî bike. Banga birêz Ocalan ne bangekî jirêzê ye, birêz Ocalan starteke nû da. Dem dema wê ye ku rastiya Kurd, destkeftiyên wê veguherînin gavên demokratîk. Birêz Ocalan, rêyek nîşan da. Banga birêz Ocalan ji bo me pisûla ye. Heta ku ev keştî û pisûla hebe, em soz didin gelê Tetwanê ku dê bi ser kevin. Rojekê teqez dê bi pisûlaya birêz Ocalan ev keştî bigihije bendergeha aştiyê, bendergeha azadî û demokrasiyê. 

 

HIŞYARIYA PROVOKASYON Û SABOTAJÊ

 

Ev bang ji bo dewlet û îktîdarê jî bû. Heta niha digotin bila birêz Ocalan bang bike. Em li giravê 4 saetan li cem birêz Ocalan bûn. Bi hevalên girtî re bûn. Di esasê xwe de birêz Ocalan ji bo welatekî têk çûyî, demokrasî, azadî û aboriya wê tune bûye deriyeke nû vekir. Firsenda demokratîkbûnê afirand. Birêz Ocalan got dev ji polîtîkayên înkar û yekperestiyê yên 100 sal in didomin berdin. Got xwedî wijdan bin, ziman û nasnameya Kurdan red nekin. Birêz Ocalan got demokrasî û ji bo van gotinên birêz Ocalan bi ser bixin, em soz didin ku dê Newroza 2025’an bikin firsenda avakirina zemîna demokrasî û birêxistinkirinê. Divê dewlet û hikûmet ji bo daxwazên gelê Kurd gavan biavêjin. Em bi banga birêz Ocalan re ne. Rêxistina birêz Ocalan jî piştgirî da. Wê demê dora dewletê ye û divê pêdiviyên bangê bicih bîne. Her ku ev pêvajo dirêj bibe dê ji provokasyon û sabotajan re vekirî be. Heke hûn nexwazin rastî provokasyon û sabotajan were, wê demê bi vê bangê bikin. 

 

DEV JI OPERASYONAN BERDIN

 

Dema me qala demokrasî, azadî û wekheviyê dikir, di sersibehê de li dijî birêz Ekrem Îmamoglû û zêdetirî 100 rewşenbîr, nivîskar û siyasetmedaran operasyon kirin. Em vê operasyonê şermezar dikin û red dikin. Ev, bi aşkerayî operasyoneke siyasî ye. Divê di serdemeke qala aştiyê tê kirin de dev ji van operasyonan berdin. Em qebûl nakin ku Îmamoglû ji ber Lihevkirina Bajar were binçavkirin. Lihevkirina Bajar, modeleke demokrasiyê ye. Dozger, bi vê operasyona xwe dibêje ku ez îradeya Tetwaniyan a li Stenbolê nas nakim. Dibêje ku Kurd nikarin li Stenbolê bi Tirkan re tifaqê bikin. Ev operasyona siyasî, di heman demê de li dijî me ye. Li dijî Lihevkirina Bajar e. Lê berevajî vê, em ê bêhtir bi Tirkan, bi kedkaran, Elewiyan û jinan re tifaqan çêbikin. Em vî aqilê cihêkar û dijminatiyê red dikin. Wê demê hûn dê der heqê hevdîtinên me yên bi AKP’ê re jî dozê vekin? Lihevkirina Bajar ne sûc e, modeleke demokratîk e. 

 

EM Ê BI HEV RE BIN

 

Bi meha ye li ser aştiya navxweyî ya Tirkiyeyê tê axaftin. Em diaxivin û civînan li dar dixin. Bawerim tişta em ji aştiya navxweyî fêm dikin û ya dozger fêm dike ne wekî hev in. Em ji bo 85 milyon welatiyan aştiyê dixwazin. Lê ev weke operasyonên siyasî fêm dikin. Ev operasyon, derbeyeke mezin a li dijî edalet, aştî û demokrasiyê ye, sabotaj e û em qebûl nakin. Em qebûl nakin ku ji îradeya ji hêla xelkê Stenbolê ve hatiye hilbijartin pênaseya rêberê rêxistina sûc were kirin. Dê piştevaniya me ya bi xelkê Stenbolê re bidome. Divê birêz Îmamoglû û binçavkiriyên din tavilê bên berdan. Divê her kes ji provokasyon û sabotajên li dijî pêvajoya aştiyê dûr bisekine.”