NAVENDA NÛÇEYAN - Partiya Çepên Kesk li gelek bajaran xebatên xwe yên hilbijartinê didomîne. Namzetan serdana gel û dikandaran kirin, şahî li dar xistin û banga beşdariya mitîngên Aydin û Mûglayê hat kirin.
Partiya Çepên Kesk amadekariyên xwe yên hilbijartinên 14'ê Gulanê hem li Kurdistan hem jî li Tirkiyeyê bê navber didomîne. Îro jî namzetên parlamenteriyê yên Partiya Çepên Kesk li gelek bajaran xebatên xwe berdewam kirin.
Di çerçoveya xebatên hilbijartinan de rêxistina Partiya Çepên Kesk a Semsûrê li gel namzetên xwe yên bajêr Alî Kenanoglu, Îzzet Karadag, Yuksel Yucedag, Bulent Çinar û Meryem Çerîtlî li navenda Semsûrê, navçeya Sergolan, Kolik û Besniyê serdana gel kirin.
Namzet Alî Kenanoglû û şandeya li gel wî serdana Kilîseya Mor Petrus û Mor Paulus ên li navenda Semsûrê kirin û piştre jî li navendê serdana dikandaran û gel kirin. Li dikandaran û welatiyan belavok belav kirin û li pirsgirêkên gel guhdar kirin. Her wiha şande ji aliye gel ve jî bi kêfxweşî hat pêşwazîkirin.
Namzet Îzzet Karadag û Meryem Cerîtlî jî çûn navçeya Sergolanê û serdana gel û dikandaran kirin. Li wir şande belavok belav kirin û ji bo çareserkirina pirsgirêkên gel ên ji ber erdhejê li welatiyan guhdar kirin.
Her wiha namzetê Bulent Çinar û Yuksel Yucedag jî li navçeya Kolikê serdana gel û dikandaran kirin.
FARQÎN
Rêxistina Partiya Çepên Kesk a Amedê jî tevî operasyona girtin û binçavkirina jî xebatên xwe yên hilbijartinê bênavber didomîne. Partiya Çepên Kesk li Cadeya Lîseyê ya navçeya Farqînê buroya hilbijartinê vekir. Namzeta partiyê Adalet Kaya, aktîvîstên TJA’yê û gelek kes tev li vekirina buroyê bûn.
Adalet Kaya di vekirina buroyê de axivî û da zanîn ku Farqîn her tim cihê şaristanî û berxwedanê bûye û ji bo têkoşîna azadiya kurd cihek girîng e û got: “Farqînê li ber polîtîkayên yekperest û faşîstê qet serî netewandiye. Ev hilbijartin ji bo me hilbijartina man û nemanê ye. Ev hilbijartin hilbijartina şandina vê zîhniyeta faşîst e. Em gelê kurd dikarin li ber vê zîhniyetê rabin û biguherînin. Em ê di 14’ê Gulanê de bi awayek xurt biçin Meclisê.”
Piştî axaftina Kaya, nûnera MEBYA-DER’ê Layihe Arşîment helbesta bi navê “Farqîn” xwend.
Şahî bi gerandina govendê bi dawî bû.
AYDIN-MÛGLA
Rêxistinên Partiya Çepên Kesk ên Aydin û Mûglayê dê sibê mitîngên hilbijartinê li dar bixin. Rêxistinên her du bajaran jî ji bo beşdariya mitîngê li navendên bajêr û navçeyan belavok belav kirin û xwestin dikandar û xelk tev li mitîngên wan bibe.
SEMSÛR
Rêxistina Partiya Çepên Kesk a Semsûrê bi tevlîbûna namzetên parlamenteriyê yên bajêr Alî Kenanoglû û Bulent Çinar li Taxa Xarxanê ya navenda Semsûrê buroya hilbijartinê vekir. Şêniyên taxê ku li ber avahiya buroya hilbijartinê kom bûbûn bi çepik û tilîliyan vekirina buroyê pîroz kirin.
Di destpêkê de namzetê parlamenteriyê Bulent Çinar axivî û bi lêv kir ku ew hilbijartin di navbera zext û êrişan û ya maf û azadiyê de ev tişt gotin: "Yan em ê zext û êrişan hilbijêrin an jî wekhevî, maf û azadiyê hilbijêrin. Armanca me jî li Semsûrê ev ê ku em bibin partiya yekem."
'EM Ê HESABÊ ERDHEJÊ JI DESTHILATÊ BIPIRSIN'
Piştre jî Alî Kenanoglû axivî û balkişand ser kereseta erdhejê ku gelê Semsûrê tenê hatibû hiştin û wiha got: "Heke em bi hez biçin parlamentoyê kanûnên ku derkevin em ê diyar bikin. Ev kanûn jî ji bo çareserkirina pirsgirêka kurd û wekheviya hemû gelan wê bibe. Têkoşîna me li ser vê axê hindik maye ku bigehejê armanca xwe. Em ê bibin aktorê pêvajoya ku maf û azadiya me bi qanûnan hat parastin bibin. Her wiha gelê Semsûrê di erdhejê de hat ji bîr kirin. Gelek kesan di bin kavîlan de jiyana xwe ji dest dan. Lê gelê Semsûrê yên ku ew di erdhejê de ji bîr kirinê di sindûqan de ji bîr nakin û wê hesab bipirsin. Em ê jî di parlamentoyê de hesabê yên ku xizm û nasên xwe di bin kavîlan de winda kirine ji vê desthilatê bipirsin."
Piştî axaftinan buroya vekirinê ji aliyê Hevserokê MEBYA-DER'a Şaxa Semsûrê Mahmût Elçî û bi çoş û çepikan hat vekirin.
AMED
Rêxistina Partiya Çepên Kesk a Amedê di çarçoveya xebatên hilbijartinê de li navçeya Yenîşehîr a Amedê bi namzetên parlementeriyê Sorgul Aytek, Halîde Turkoglû, Ceylan Akça û Serhat Eren û Hevberdavka Partiya Çepên Kesk a Amedê Pinar Sakik Tekîn û Hevserokê HDP’ê yê Amedê Zeyyat Ceylan serdana dikandaran kir. Şande bi coşeke mezin hat peşwazîkirin.
Welatiyên di şaneşîne û paceyên xaniyên xwe de bi çepik, tîlîlî û nîşaneya serkeftinê piştgiriya xwe ya bi partiyê re diyar kirin.
Namzetan ji gel xwest ku piştî dengdanê li dengê xwe xwedî derkevin. Di dema serdanê de belavok hatin belavkirin.
Li taxên Yenîşehîrê dirûşmeyên “Kartol Pîvaz oxir be Erdoxan”, “Ji girtiyan re Azadî”, Jin jiyan Azadî” hatin berzkirin û gotina “12-0” olan da.