Di rapora binpêkirina mafên rojnamevanên jin a meha îlonê ya MKG'ê de hat diyarkirin ku di meha îlonê de jî gefxwarin û tundiya li ser rojnamevanên jin dewam kir û niha 7 jinên rojnameger girtî ne.
Li Stenbolê cenazeyên 2 jinên Semîh Çelîk qetil kirine, ji ATK’ê hatin girtin.
Malbata girtiya li Girtîgeha Evînê tê ragirtin Nergîs Muhammedî anî ziman ku dermankirina keça wan tê astengkirin û banga hestiyariyê li rêxistinên mafên mirovan kirin.
Li îranê rojnamegera girtî Serûnaz Ahmed ji ber destûrê nadin ji kontrola tenduristiyê derbas bibe, ev 28 roj in xwarina dermanan red dike.
Ji Şaredariya Bajarê Mezin a Wanê gaveke pêşeng ji bo jinan avêt û dê Pirtûkxaneya Berhemên Jinan û Navenda Lêkolînê veke.
Rojnamevan-akademisyen Nagîhan Akarsel a hate qetilkirin li ser gora xwe hate bibîranîn. Parlamentera DEM Partiyê Sabahat Erdogan Saritaş, wiha got: “Feraseta ku Nagîhan heval qetil kir, feraseta dijminê jinan a serweriya mêr e. Bila bitirsin ji ber ku em ê dest ji têkoşîna wê bernedin.”
Faîl Mehmet Demîrhan ê li Amedê Hîlal Kar bi çekê qetil kir, hate girtin.
MKG'ê bi boneya duyemîn salvegera qetilkirina rojnameger û akademîsyen Nagihan Akarselê daxuyanî da û got: “Em ê pênûsa Nagihanê her tim zindî bihêlin. Têkoşîna wê dê li her derê olan bide.”
Ji Akademiya Jineolojiyê ya Rojhilata Navîn Zahîda Mamo diyar ki ku Nagihan Akarsel li her cihê tê re derbas bûye şopa xwe hiştiye û wiha got: “Me bi Nagihanê re Jineolojî nas kir. Peyv bi peyv ev zanist nîşanî me da.”
Jinan li Wanê banga tevlîbûna “Mîtînga Azadiyê” ya ku dê di 13’ê Cotmehê de were lidarxistin kir û got: “Em ê bi hêza felsefeya ‘Jin, Jiyan, Azadî’ li Amedê bin.”
Şaredariya Bajarê Mezin a Mêrdînê ji bo jinên temenê wan di navbera 18-64’ê de û berhewce ne, sepana JINKART’ê dide destpêkirin. Serlêdana ji bo JINKART’ê dê di 4’ê cotmehê de dest pê bikin.
Dîlan Yildirim bi awayekî guman jiyana xwe ji dest da û piştre hevjînê wê Îlhan Yildirim “Bi qisûr sedembûna kuştinê” hat binçavkirin û piştre hate berdan. Malbata Dîlan Yildirimê bertek nîşanî biryara berdana Îlham Yildirim da û wiha got: “Ev ne xwekuştin e, cînayet e!”
Hevala têkoşînê ya Nagîhan Akarselê Necîbe Karadag a ku dê li cihê ku hevdu bidîtana dengê çekê bihîstiye wiha got: “Nagihan xewna hemû jinên bedêldayî pêk dianî, lewma jin xwedî li têkoşîna wê derketin.”
Li navçeya Dîdîmê Sîbel Aygan a ji aliyê mêrê pê re di asta hevberdanê de bû ve hate qetilkirin.
Platforma Jinan a Wanê û Platforma Ked û Demokrasiyê ya Wanê ji bo Rojîn Kabaîş a ji 27’ê mehê ve winda ye, li kampusa zanîngehê ku Kabaîş lê winda bû daxuyanî da. Di daxuyaniyê de hat gotin ku ew dê şopdarên xebatên lêgerînê bin.