MÊRDÎN - DEDAŞ'ê bi hinceta deynê ceyranê trafoyê cotkar desteser kir û mala wî bê ceryan hişt. Turkiye Çiray a 84 salî ku li malê dijî û ji sedî 98 astengdar e û girêdayî amûra hilmijînê ye jî, bû mexdûrê qutkirina ceryanê.
Şîrketa Anonîm a Belavkirina Ceryanê ya Dîcleyê (DEDAŞ) li Mêrdînê bi hinceta deynên cotkaran ên avdana çandiniyê, desteserkirina trafoyan didomîne. Tîmên DEDAŞ'ê yên ku di 6'ê Sibatê de bi leşkeran ve bi ser gundê Hecî Evdo yê girêdayî Artukluyê de girtin, trafoya malbata Çirayê ku ji bo avdana çandiniyê dihat bikaranîn, bi hinceta deynên ceyranê desteser kir. Ji ber ku ceryana malê jî ji heman trafoyê dihat, bi desteserkirina trafoyê re mal jî bê ceryan ma.
Turkiye Çiray a 84 salî ku ji sedî 98 astengdar e û li malê dijî û di nav nivînan de girêdayî amûra hilmijînê ye, ceryana wê hat qutkirin.
Kurê Turkiye Çiray Erdal Çiray diyar kir ku tîmên DEDAŞ'ê avêtine ser gundên wan û trafoyên wan desteser kirin. Çiray anî ziman ku tevî dayika wî bi amûra hilmijandinê ve girêdayî ye jî trafo hatiye desteserkirin.
Çiray anî ziman ku tevî cotkar e jî 16 milyon TL deyn wî heye û got ku DEDAŞ'ê jê re gotiye "mîlyonekê bide min ez ê ceyrana te berdim." Çiray bal kişand ser desteka ku DEDAŞ bi salan e desteser dike û wiha got: “Ji welatiyan re jî 2 milyon û 3 milyon fatûre şandin. Ez îro erdê xwe bifiroşim jî ez ê nikaribim vî deynî bidim. Him van pereyan ji welatiyan distînin û him jî dewletê talan dikin."
Çiray bi bîr xist ku bi leşkeran re avêtine ser gund û bêyî ku li wan guhdarî bikin trafoyên wan hatine desteserkirin û got: “Jiyana mirovekê di xetereyê de ye. Dema ku jiyana kesekê di xetereyê de be, ew vê yekê çawa dikin? Bi awayekî fermî veguheriye çeteyekî diziyê. Parêzer dibêje, milyonekê bîne em trafoyê bihêlin. Ma jiyana keseke di xetereyê de girêdayî mîlyonekê ye? Me îro bi kişandina kabloyê ji cihekî din pirsgirêk çareser kir, lê sibe dê tîmeke din were wê kabloyê bibîne û wê bêje 'ceryana qaçax xerc dikin.' Bi vî awayî ewlehiya jiyana dayika min di bin xeteriyê de ye. Heke tiştek biqewime ez ê giliyê DEDAŞ’ê bikim."
Têkildarî mijarê rayedarên DEDAŞ'ê jî li xwe mikur hatin ku trafo ji ber deynê çandiniyê yê malbatê hatiye desteserkirin û anîn ziman ku ji ber nexweşiya Turkiye Çîrayê, ji trafoyê DEDAŞ'ê ceryan ji bo odeya wê hatiye dayîn.
MA / Ahmet Kanbal