RIHA - Endamê Konseya Serokatiyê ya PYD’ê Salih Muslim diyar kir ku hevdîtinên bi Abdullah Ocalan re ji bo çareseriya pirsgirêkan pir girîng in û got: “Çareseriya bi rêya diyalogê ji bo her kesî dê baştir bibe.”
Bi hilweşîna rejîma Esad re li Sûriyeyê hevsengî guherîn. Rêveberiya welêt radestî Heyet Tahrîr el-Şamê (HTŞ) hate kirin. Dewleta tirk û koma wê ya paramîlîter SMO’yê jî li dijî bajarên Bakur û Rojhilatê Sûriyeyê êriş dan destpêkirin. Êriş niha bi taybet jî li Bendava Tişrînê bi dijwarî didomin. Dewleta tirk li gel êrişan, her wiha li dijî statûya Rêveberiya Xweser jî xebatên dîplomatîk didomîne.
Rêveberiya Xweser jî li dijî xetere û gefên heyî, lez da xebatên ji bo yekitiyê. Piştî hevdîtinên di navbera partiyan de, Fermandarê Giştî yê Hêzên Sûriyeya Demokratîk (HSD) Mazlum Ebdî, li Hewlêrê bi Serokê PDK’ê Mesûd Barzanî re hevdîtin kir.
Endamê Konseya Serokatiyê ya Partiya Yekitiya Demokratîk (PYD) Salih Muslim, têkildarî êriş û geşedanên li herêmê axivî.
'HEDEFA TIRKIYEYÊ KOBANÊ YE’
Salih Muslim, da zanîn ku êrişên li Bendava Tişrînê û Pira Qereqozaqê didomin û wiha got: “Şerê li herêma me hêj berdewam e. Tirkiye tevî çeteyên xwe êrişên hewayî didomîne. Li dijî vê gel jî çûye herêmê. Lê Tirkiye ji hewayî ve sivîlan hedef digire. Sivîl ji bo Bendav nebe hedefa êrişan hate wir. Lê niha hedef tên girtin. Hedefa esasî ya êrişên Tirkiyeyê Kobanê ye. Tirkiyeyê piştî HTŞ’ê rêveberiya Şamê bi dest xistî êrişên xwe zêde kir. Dixwaze herêmên Kurdan dagir bike. Ji bo derbasî Herêma Firatê bibe dixwaze Tişrîn û Qereqozaqê kontrol bike. Lê heta niha bi ser neketiye.”
JI HTŞ'Ê RE: HEKE JIDIL BIN BILA BERTEKÊ NÎŞANÎ ÊRIŞAN BIDIN
Muslim, bal kişand ser helwesta Koalîsyona Navneteweyî ya li dijî êrişan û wiha got: “Bertekên koalîsyonê tenê di asta dîplomatîk de ne. Li qadê mudaxileyek tune ye. Em, têkiliyên xwe yên bi koalîsyonê re stratejîk dibînin. Ji ber ku li dijî terorîzmê têkoşîn wiha dibe. Êrişên Tirkiyeyê dike ku DAIŞ dîsa bihêz bibe û xwe organîze bike. Ev yek xetereyeke mezin e. Heke êrişên Tirkiyeyê nesekinin, dê ev gef mezintir bibe. HTŞ dibêje ‘em ê tevahiya Sûriyeyê biparêzin.’ Lê tu bertekan nîşanî êrişên Tirkiyeyê nade. Heke jidil bin bila bên em bi hev re Sûriyeyê biparêzin.”
‘DIYALOGA DI NAVBERA KURDAN DE ŞERT E’
Muslim, anî ziman ku li dijî êrişan yekitiya Kurdan ferz e û wiha domand: “Birêz Mazlum Ebdî û birêz Mesûd Barzanî hevdîtin kir û ev ji bo gelê Kurd pir girîng e. Ji bo çareseriya pirsgirêkên heyî û yekitiya Kurdan, divê gav bidomin. Di hevdîtinê de li ser pirsgirêkên Kurdan axaftin hatin kirin û biryar hat dayin ku rêyên diyalogê vekirî bin. Li dijî êrişan, em li welatên Ewropayê jî hevdîtinên dîplomatîk dikin. Em li bendê ne ku DYA jî têkildarî êrişan daxuyaniyê bide. Em li bendê ne ku Trump ji bo agirbesta berê hatiye îmzekirin dîsa bikeve meriyetê daxuyaniyê bide. Lê em ji bo her tiştekî xwe amade dikin.”
‘KURD BI OCALAN RE DILSOZ IN’
Muslim, bi lêv kir ku hevdîtinên bi Rêberê PKK’ê Abdullah Ocalan re ji bo çareseriya pirsgirêkan xwedî roleke krîtîk in û axaftina xwe wiha qedand: “Tirkiye pirsgirêka xwe ya bi Kurdan re çareser nake û bingeha pirsgirêkên îro jî ev e. Heke bi rêya diyalogê çareser bike, dê êrişên ser me jî bi dawî bibin. Gelê Kurd dilsozê birêz Ocalan e. Çareseriya bi rêya diyalogê dê ji bo her kesî baş bibe. Gelê Kurd li Rojhilata Navîn niha pêşengtiya demokrasiyê dike. Divê her kes xwedî li pêvajoyê derkeve.”
MA / Delal Akyuz