WAN - Dikandaran diyar kirin ku şaredariya di bin rêveberiya qeyûm de tevî kabloyên înternetê û av zirarê dibînin jî çêkirina rêyê didomîne û gotin ku tişta qeyûm dike wan mexdûr dike. Welatiyan bertek nîşan da ku 2 meh in rê nehatiye temamkirin. 

 

Şaredariya Bajarê Mezin a Wanê ya ku ji aliyê qeyûm ve tê birêvebirin, tevî kabloyên av û înternetê yên zirar dîtine jî, çêkirina rêyê ji bo şebekeyên zirar dîtine didomîne. Dikandaran bertek nîşanî vê yekê da. Xebata ku li Kolana Eskî Cezaevi ya navçeya Rêya Armûşê dest pê kir û du meh in neqediyaye, ji aliyê dikandaran ve bû cihê bertekan. Xebata ku di nav qadeke 100 metreyî de dest pê kir û 2 meh in neqediyaye, zirarê dide şebekeyên tamîrkirî û dikandar bê ceryan û înternet dimînin. 

 

'EZ Ê DIKANÊ BIGIRIM'

 

Sînan Arda ku derenceyên dikana wî ji ber xebata navborî hilweşiyane, diyar kir ku rewşa rêyan a du mehan bandoreke neyînî li ser karsaziya wî kiriye û xerîdar nikarin bikevin hundir. Arda, got: "Ji min re gotin ku ew ê derenceyeke piçûk ji bo dikanê çêbikin, lê hîn jî çênekirine. Em debara xwe dı ser medyaya sanal re dikin, lê ji ber ku wan înterneta me qut kiriye, firotina me rawestiyaye. Ava dikana me jî qut bûye û em bi rojan e avê ji mizgeftê tînin. Karê me rawestiyaye û em nikarin qezenc bikin. Wisa bidome ez ê dikana xwe bigirim." 

 

Dikandar Kerîm Yilmaz bertek nîşanî neçêkirina rêyê da ku ji du mehan zêdetir e nayê çêkirin û got: "Qeyûm berpirsê van hemûyan e. Her gava projeyek hebe ku ew difikirin ku ji bo kurdan baş be, ew tavilê tiştekî din dibînin ku wê asteng bikin. Yên ku niha li pey qeyûm in, bi qasî qeyûm zalim in. Em naxwazin ku ew bajarê me talan bikin. Sedema ku ew rêyên bêkêmasî ji nû ve ava dikin ev e ku bêtir pereyên gel bidizin. Bi kolandina hemû rêyên teng di carekê de, wan trafîkê xitimandiye." 

 

Ji welatiyan Azat Bayram jî diyar kir ku qeyûm veberhênanên nehewce dike û ji bo berjewendiya gel tu xizmetek pêşkêş nekiriye.