ENQERE - Feminîst û profesora felsefeya zanistê Helen Longino, ji DEM Partiyê re name şand û got: “Bi rastî jî banga Abdullah Ocalan ku têkoşîna çekdarî dide aliyekî û ji bo Kurdan û her kesên li Tirkiyeyê dijîn daxwaza bidestxistina hemû mafan a bi rêyên aştiyane, bandor li min kir.”
Feminîst û profesora felsefeya zanistê ya Amerîkî, Helen Longino têkildarî Banga Aştî û Civaka Demokratîk a Rêberê Gelê Kurd Abdullah Ocalan, ji DEM Partiyê re nameyek şand.
Helen Longino, di nameya xwe de got: “Ez, biryardariya DEM Partiyê ya ji bo avakirina civakeke aştiyane, piranîparêz û demokratîk a li Tirkiyeyê, bi keyfxweşî pêşwazî dikim. Bi rastî jî banga Abdullah Ocalan ku têkoşîna çekdarî dide aliyekî û ji bo Kurdan û her kesên li Tirkiyeyê dijîn daxwaza bidestxistina hemû mafan a bi rêyên aştiyane, bandor li min kir. Di têkoşîna we de ji we re serkeftinê dixwazim.”
HELEN LONGÎNO KÎ YE?
Helen Longino, li Zanîngeha Stanfordê di Beşa Felsefeyê de hîndekar e. Li ser felsefe, epîstemolojiya sosyal û felsefeya feminîst gelek pirtûk nivîsand. Helen Longino ku tespîta “Pêdiviya feminîzmê bi zanistê û ya zanistê jî bi feminîzmê heye” dike, yek ji fîlozofên zanista feminîzmê ya herî bibandor tê qebûlkirin.