Nûçegihana JINNEWS'ê Oznûr Deger ku 7'ê Sibatê li navçeya Qoser a Mêrdînê di serdegirtina malê de bi îşkenceyê hatibû binçavkirin û piştre bi îdîaya 'rêze propagandaya rêxistinê kiriye' hate girtin. Deger serpêhatiyên xwe yên dema pêvajoya girtinê bi nameyekê ji Ajansa Mezopotamyayê (MA) re vegot. Oznûr Deger ku piştî hat girtin şandin Girtîgeha Jinan a Tîpa E ya Mêrdînê û piştre di 26'ê Sibatê de bêyî agahiyê bidin malbatê û parêzeran sewqî Girtîgeha Jinan a Erzînganê hat kirin, girtina xwe weke 'operasyona tolhildanê' binav kir.

 

Oznûr Deger di nameya xwe de bi bîr xist ku di serdegirtina malê de deriyên malê ji aliyê Polîsên Tevgera Taybet ve hatine şikandin û bi lêdanê hatiye kelepçekirin û ji dema binçavkirinê heta ku bînin girtîgehê îşkenceyeke sîstematîk li wê tê kirin. Oznûr Deger di nameya xwe de wiha got: "Ji serdegirtina malê heta bi binçavkirinê û biryara girtinê, bi awayekî sîstematîk îşkence hebû. Li gorî xwe tola Mîdyatê hiltînin. Girtina min ji tolhildanê wêdetir e, tiştekî ku bi hiqûqê were vegotin nîn e."

 

Oznûr Deger di nameya xwe de diyar kir ku ji ber bertek nîşanî bêexlaqiyê daye li hemberî wê ‘operasyona tolhildanê’ hatiye lidarxistin. 

 

'NE ÎDÎANAME, FEZLEKEYA POLÎSAN E' 

 

Deger îdianameya ku ji aliyê 2’emîn Dadgeha Cezayê Giran a Mêrdînê hatiye amadekirin rexne kir û wiha got: "Ji bo mirov ji vê re bibêje îdianame hezar şahid lazim in. Hewl dan ku ji hesabê min ê X’ê îdîanameyekê amade bikin. Li şûna îdîanameyekê bêjin 'fezlekeya polîsan' gûncavtir e."

 

Oznûr Deger di nameya xwe de diyar kir ku îdîaname ji parvekirina nûçeyên xwe, nûçeyên rojnameya Yenî Yaşamê, Ajansa Mezopotamyayê (MA) û JINNEWS'ê û parvekirinên wê yên li ser rojnamegerên hatine kuştin pêk tê û aliyekî hiqûqî ya vê îdîanameyê nîn e.

 

Oznûr Deger di nameya xwe de bibîr xist ku danîşîna yekem wê di 22'ê Gulanê de pêk were û diyar kir ku biryara girtina wê bi talîmatê pêk hatiye û dadgerên ku biryar dane wijdana wan nîn e, lê ji bo heyeta ku wê dosyayê binirxîne re sebir xwest.

 

'GIRTÎGEH DI NAVA SÎSTEMA TECRÎDÊ DE YE'

 

Oznûr Deger di nameya xwe de balê kişand ser binpêkirinên li girtîgehê û diyar kir ku girtîgeha lê dimîne li Tirkiyeyê yekemîn Girtîgeha Jinan a Ewlehiya Bilind e û 4 qawîşên wê hene lê hema bêje derfetên ragihandinê nîn in û wiha got: "Şert û merc ji aliyê fîzîkî ve zehmet in û tecrîd bi temamî sîstematîk e. Tu sohbet tune ye. Tekane tişt qursa enstrumanê ye, ku ancax 6-7 heval dikarin tevlê bibin. Li her qawîşê 6 odeyên biçûk ên li kêleka hev hatine rêzkirin, cureyê hucreyê û deriyên odeyan êvarê saet di 22.00’an de bi awayekî otomatîk tên girtin. Eger bi şev tiştek bi serê te were, hevalê te yê li cem te wê nikaribe alîkarî bide te. Ji ber ku ew li odeya xwe kilîtkirî ye."

 

Oznûr Deger di nameya xwe de diyar kir ku ew di girtîgehê de ye û di nameya xwe de wiha dibêje: "Wekî hûn jî dizanin, girtîgeh navend e. Tiştekî baştir nîne û girtîgehên bi hemû tîpên alfabeyê hatine vekirin, li wê nuqteyê ne ku mîna ya berê xuya dikin."

 

Oznûr Deger anî ziman ku ew di girtîgehê de ye û wiha dibêje: "Wekî hûn jî dizanin, girtîgeh navenda zextên psîkolojîk e. Tiştekî baştir nîne û girtîgehên bi hemû tîpên alfabeyê hatine vekirin, yek ji ya din xirabtir e."

 

Oznûr Deger da zanîn ku di girtîgehê de şopandina medyayê pir kêm e û ew tenê dikarin li derveyî medyaya navendî Halk TV'yê temaşe bikin û wiha pê de çû: "Ji ber vê yekê em hewl didin bi derfetên kêm pêvajoya krîtîk bişopînin û şîrove bikin."

 

Oznûr Deger wiha dawî li nameya xwe anî: "Bi giştî rewşa min baş e. Morala min baş e. Ez hewl didim ku pêvajoyê baş bi kar bînim. Ez bêtir dixwînim. Tekane tişta ku em dikin; deng, qêrîn û ragihandina serhildanê ye. Ji bo vê jî daxwaza me ya herî mezin ew e ku gel û civak azad bibin.''