STENBOL - Ciwanên enternasyonal diyar kirin ku Abdullah Ocalan bi banga xwe deriyê feraseteke nû ya siyasetê vekiriye û gotin ku perspektîfa wî wê pêşengiya hemû tevgerên şoreşger ên cîhanê bike.

 

Bandora "Banga Aştî û Civaka Demokratîk" a ku ji aliyê Rêberê Gelê Kurd Abdullah Ocalan ve di 27'ê Sibatê de hat ragihandin, didome. Piştgiriya ji bo banga ku li gelek deverên cîhanê bandoreke mezin dike zêde dibe. Komek ciwanên navneteweyî yên ku ji welatên cuda beşdarî Newroza Amedê bûn, çavdêriyên xwe yên li qadên Newrozê yên bi bandora banga dîrokî hatin pîrozkirin, parve kirin û der barê bangawaziyê de fikrên xwe anîn ziman.

 

Endamê Komên Ciwanên Navneteweyî (Internationale Jugendkommune) Sîmon Helfrîch diyar kir ku ev demeke dirêj e rojeva Kurdistanê dişopîne û bal kişand ser "Banga Aştî û Civaka Demokratîk" a Abdullah Ocalan. Helfrîch got: "Kesên ku xizmên xwe di têkoşînê de winda kirine, ji banga dîrokî gelekî bi hêvî ne. Li benda guhertinê ne. Abdullah Ocalan rê li ber feraseteke nû ya siyasetê vedike."

 

'EM BI OCALAN BAWER IN'

 

Helfrich diyar kir ku ew pirsgirêka kurd wekî pirsgirêka xwe dibînin û ji bo çareseriya wê têdikoşin û got: "Rêya herî girîng a çareseriyê ew e ku gelê kurd, tirk û gelên din ên Kurdistanê bi xwe biryarê bidin ku dixwazin bi hev re bijîn. Em di 21'ê Adarê de çûn Newroza Amedê. Li vê derê me dît ku ciwanên Kurdistanê piştgirî dan tevgera azadiyê. Me dît ku ciwanên Kurdistanê di pêvajoya nû de pêşengiyê dikin. Me dît ku pêngava ku Abdullah Ocalan daye destpêkirin ne qels e." 

 

Helfrich da xuyakirin ku derdorên navneteweyî jî banga dîrokî û pêvajoya piştî wê ji nêz ve dişopînin û got: "Em gelekî di wê baweriyê de ne ku perspektîfa Abdullah Ocalan wê pêşengiya hemû tevgerên şoreşger ên cîhanê bike."

 

Endama Meclisa Ciwanan a Partiya Çep a Komarî Susana Miquelê jî da xuyakirin ku banga Abdullah Ocalan bandoreke mezin kiriye û got: "Ez difikirim ku gelê kurd çekan deyne jî, ji bo parastina daxwazên xwe bi hêz e. Em ê ji Katalonya û welatên din ên Ewropayê piştgiriyê bidin doza kurdan. Ji ber ku em difikirin ku kurd ji bo cîhaneke baştir têdikoşin, ji ber vê yekê gelê kurd bi salan ji bo nasnameya xwe têkoşiya."

 

Susana Miquel di dawiya axaftina xwe de got: "Ez perspektîf û stratejiya tevgera kurd pîroz dikim. Rojên ku me li Kurdistanê derbas kirin, ev tişt bi min dan hîskirin." 

 

MA / Melîk Çelîk