Di 19’ê Adarê de li dijî Şaredariya Bajarê Mezin a Stenbolê de lêpirsîn hate destpêkirin û di çarçoveya lêpirsînê de bi sedan kes hatin binçavkirin. Şaredarê Bajarê Mezin ê Stenbolê Ekrem Îmamoglû jî di nav de 48 kes hatin girtin. Çalakiyên li dijî girtinan hatine desptêkirin hêj berdewam in. Wezareta Karên Hundir duh bi daxuyaniyekê ragihand ku heta niha li seranserî welat hezar û 879 kes hatine binçavkirin. 

 

Di 22’yê Adarê de jî li Eskîşehîrê bi ser malan de hate girtin û 14 ciwan bi hinceta beşdarî çalakiyan bûne hatin binçavkirin. Ciwanên ku 4 rojan di bin çavan de man, sewqî dadgehê hatin kirin. Dadgehê, bi şertê kontrola edlî biryara berdanê da. Ciwanan, tiştên li emniyetê jiyane vegotin. 

 

‘ÎŞKENCE LI KOLANAN DEST PÊ KIR’

 

Tevfîk Dervîş Sakalli diyar kir ku îşkenceya li kolanan ji ewil bi gaza îsotê û guleyên plastîk ên ji nêz ve dihatin avêtin dest pê kiriye û got: “Li emniyetê bi zor û zehmetî karî mafên xwe yên hevdîtina bi parêzeran re, xwarin û vexwarinê bi kar bînin. Her tim gef dixwarin û di nava hewldana ‘terbiyekirinê’ de bûn. Cihê em lê diman gelek qirêjî bû. Daşirên ku qet nehatine paqijkirin hebûn. Dema em birîn nexweşxaneyê jî destên me ji pişt ve hatin kelemçekirin û piştî muayeneya bijîşkan jî em hatin derbkirin.” Sakalli, bal kişand ser êrişên li ser çalakiyên ciwan pêşengtiya wan dikin û ev tişt anî ziman: “Ditirsin, ji ber ku ciwan hêza herî çalak a civakê ye. Hêzên ewlekariyê yên payebilind jî di ferqa vê rastiyê de ne.” 

 

‘HEWL DAN DAXWAZA PED’Ê ASTENG BIKIN’ 

 

Ceren Leventoglû jî bi lêv kir ku demekî dirêj destûr nehat dayin bi parêzerên xwe re hevdîtinê bikin û wiha got: “Hevalên me yên regl bûn, daxwaza pedên bihîjyen kirin lê hewl dan asteng bikin. Li nezaretxaneyên ji bo kesekî em sê kes lê hatin bicihkirin. Gelek ji me neçar man li erdê razên. Hinek hevalên me nexweş bûn, hinek rewşa wan aloz bûn û hinek jî bi ambulansan birin nexweşxaneyê. Polîsan hewl dan ambulansan jî asteng bikin. Me li ber xwe da û mafên xwe bi dest xistin. Polîsan, weke rêbazeke îşkenceyê nehiştin ambulans di dema xwe de bên. Ji ber şert û mercên nebihîjyen, gelek hevalên jin enfeksiyon lê peyda bû.” 

 

‘ÇARESERÎ NE LI SRE SINDOQÊ LI KOLANA YE’ 

 

Îbrahîm Demîryurek jî anî ziman ku bi serdegirtinên malan hewl didin wan krîmînalîze bikin û axaftina xwe wiha qedand: “Ji hêla psîkolojîk ve dixwazin me bêzar bikin. Di tevahiya 4 rojên binçavkirinê de betaniyeyên qirêjî ku dilê mirovî jê dixeliya dane me. Hucreyan hewa nedigir û em neçar man li ser betonê razên. Nehiştin parêzer şekir û ava ku ji bo hevalên di greva birçîbûnê de anîbûn, bidin wan. Her cara em diçin kontrola tenduristiyê, hêzên ewlekariyê hevalekî me kelemçe dikir û pêhn lê dixistin. Hewl didin bi qedexeyan bêdeng bikin û terbiye bikin. Her tim tundiya psîkolojîk dikirin. Daxwaza gelê me heye ku ji bo berxwedaneke çalaktir û baştir piştgiriyê bide ciwanan. Ciwan, hêza herî çalak a civakê ye û nîşan da ku çareserî ne li ser sindoqê lê li kolanan û bi serdeçûna ser berîqet û qedexeyan e. Di vê pêvajoyê de me hewl da bi avakirina komîte-konsey û meclisan hem li fakûlteyan hem jî li kampusan serhildana gel bilind bikin. Lewma em fêm dikin bê ka çima îktîdara siyasî ewqas tundiyê bi kar tîne û gefan li civakê dixwe.” 

 

MA / Enes Beyaz