ENQERE - Rêberê PKK’ê Abdullah Ocalan duh di hevdîtina duyemîn a bi Şandeya Îmraliyê de têkildarî pêvajoyê wiha got: “Ez gelek hêja dibînim. Divê em vê carê bi ser kevin.” Her wiha Abdullah Ocalan ji ber şewata Kartalkayayê nexwest daxuyaniyeke berfireh were dayin.
Endamên Şandeya Îmraliyê ya Partiya Wekhevî û Demokrasiyê ya Gelan (DEM Partî) Sirri Sureyya Onder û Pervîn Buldan duh li Girtîgeha Tîpa F a bi Ewlekariya Bilind a Îmraliyê bi Rêberê PKK’ê Abdullah Ocalan re cara duyemîn hevdîtin kirin. Şandeyê, îro têkildarî hevdîtinê daxuyaniyeke nivîskî weşand. Di daxuyaniyê de wiha hate gotin: “Ev pêvajo ji bo her kesî, ji bo me hemûyan jiyana azad û bi hev re ava dike.”
Piştî daxuyaniyê me xwe gihand rayedarên DEM Partiyê û hinek kitekitên hevdîtina di navbera Abdullah Ocalan û şandeyê de bi me re parve kirin.
‘EZ GELEK HÊJA DIBÎNIM’
Rayedarê DEM Partiyê anî ziman ku di hevdîtina 4 saetan domiyayî de şandeyê têkildarî serdanên piştî hevdîtina ewil bi derdorên cuda re hatine kirin û eleqeya raya giştî ya ji bo pêvajoyê, agahiyên berfireh bi Rêberê PKK’ê Abdullah Ocalan re parve kiriye. Heman rayedarî got ku Abdullah Ocalan jî têkildarî agahdarkirinê wiha got: “Ez pir hêja dibînim.”
‘DIVÊ EM VE CARÊ BI SER KEVIN’
Rayedarê behsa xeberê anî ziman ku Rêberê PKK’ê Abdullah Ocalan di hevdîtinê de got; “Divê her kes bi awayekî erênî ji bo van nîqaşan sûdewer be û piştgiriyê bidin û ev yek dê bi her kesî bide qezencekirin.” Hat diyarkirin ku Abdullah Ocalan xwestiye ku divê ev pêvajo bêhtir pêş bikeve.
Rayedareke din ê DEM Partiyê jî destnîşan kir ku Abdullah Ocalan têkildarî pêvajoyê wiha gotiye: “Rêya me hêj dirêj e. Divê em vê carê bi ser kevin.”
ÇIMA DAXUYANIYEKE BERFIREH NEHAT KIRIN?
Di hevdîtinê her wiha Abdullah Ocalan têkildarî geşedanên di rojevê de, pirsgirêka Kurd, pirsgirêk û geşedanên li Tirkiye û herêmê tên jiyîn jî nirxandinên berfireh kir. Rayedar got ku Abdullah Ocalan xemgîniya xwe ya ji ber welatiyên di şewata li Boluyê de jiyana xwe ji dest dayin aniye ziman.
Heman rayedarî destnîşan kir ku Abdullah Ocalan di hevdîtinê de ji ber karesata li Boluyê û ragihandina “şîna netewî” bi şandeyê re nîqaş kiriye û gotiye ka daxuyaniyeke berfireh bê dayin raste yan na. Rayedarî, bilêv kir ku herî dawî biryar hate dayin ku daxuyaniyeke berfireh neyê dayin.
Rayedarê DEM Partiyî anî ziman ku Abdullah Ocalan ji bo kesên jiyana xwe ji dest dayin ji Tirkiyeyê re sersaxî û ji bo birîndaran jî şîfaya xêrê xwestiye.
DÊ LI GORÎ HEWCEDARIYÊ DAXUYANÎ BÊ DAYIN
Me pirsa “Gelo dê têkildarî pêvajoyê di demên pêş de daxuyaniyeke befireh were dayin?” ji rayedarê DEM Partiyî kir. Rayedarî got: “Di rojên pêş de li gorî hewcedariyê em ê têkildarî hevdîtinê hinek kitekitan bi raya giştî re parve bikin.”
Hat ragihandin ku Şandeya Îmraliyê ya DEM Partiyê dê di rojên pêş de hevdîtin û xebatên berfireh bike.
MA / Mehmet Aslan