Gelê Kurd li gorî Salnameya Rumî, şeva 13’ê Çileyê girêdayî 14’ê Çileyê dike weke Serê Salê qebûl dike û pîroz dike. Di pîrozbahiyên Serê Salê de zilam cil û bergên jinan û jin jî cil û bergên zilaman li xwe dikin. Kolan bi kolan digerin û dibêjin “Serê salê pîroz be.” Organîzasyona Sanatça, Komeleya Çand û Hunerê ya Dîcleyê, Şanoya Bajar a Amedê û şaredariyên DEM Partiyî dê îsal jî li Amedê Serê Salê bi çalakiyên cuda pîroz bikin. Serê Salê dê bi “kosegelî”, konser û şanoyan bê pîrozkirin.

 

SERÊ SALÊ ÇAWA TÊ PÎROZKIRIN?

 

Hevserokê Komeleya Çand û Hunerê yê Dîcleyê Celal Ekîn, banga tevlibûna pîrozbahiyan li xelkê bajar kir. Ekîn, diyar kir ku ciwan her sal Serê Salê bi coşeke mezin pîroz dikin û wiha got: “Di van pîrozbahiyan de jî zilam dê cil û bergên jinan û jin jî dê yên zilaman li xwe bikin, dê li amûrên muzîkê bixin, bi şahiyan biçin serdana cîranan. Di serdanên malan de daxwaza malbatê çi be ew tê hêvîkirin. Hêviyên weke ‘Serê Salê binê salê, xwedê tu kurekî/keçekî bide vê malê’tên kirin. Her wiha diyarî tên dayin. Kesên tev li çalakiyê dibin jî diyariyan didin hev. Lewma kevneşopiyeke pir kevn e.”

 

Hevserokê Komeleya Çand û Hunerê Celal Ekîn

 

Bi domdarî Ekîn anî ziman ku bi saya tevgera azadiyê ya Kurd, gelê Kurd dîsa li çanda xwe ya li ber tunebûnê vegeriyaye û wiha got: “Bi saya tevgera azadiyê gelê me dixwaze dîrok û zimanê xwe bidomîne. Weke mînak, Newroz çi bû, tu kesî nedizanî. Dihat pîrozkirin lê çima dihat pîrozkirin kesekî nedizanî. Êdî gel xwedî li çanda xwe derdikeve. Ji ewil xwedî li zimanê xwe derketin, piştre li stran û çanda xwe. Bi vî awayî gelek saziyên çandê hatin avakirin.” 

 

‘LI HER CIHÊ KURD LÊ DIJÎN TÊ PÎROZKIRIN’ 

 

Ekîn, bal kişand ser girîngiya çandê ya ji bo gelan û wiha got: “Serê Salê jî çandeke. Ne tenê li Kurdistanê, li her cihê Kurd lê dijîn tê pîrozkirin. Pergal dixwaze gel çanda xwe ji bîr bike û kes xwedî lê dernekeve. Lê em ê çanda xwe bidin jiyîn. Ev çand, fedekarî ye, hezkirin e, bihêzkirina jiyanê û kolektîfkirina jiyanê ye. Divê em vê di nava civakê de xurt bikin. Divê mirov çandên gelan tînin gel hev xurt bike.” 

 

BANGA TEVLIBÛNA ÇALAKIYAN

 

Ekîn, axaftina xwe wiha qedand: “Serê Salê êdî her sal li Amedê tê pîrozkirin. Zêdetir em li Sûrê pîroz dikin. Ciwanên me derdikevin derve û çalakiyên bi xweşiya gel diçin li dar dixin. Bi şev jî saziyên me çalakiyan li dar dixin. Pîrozbahî 3-4 rojan didomin. Di 12’ê Çileyê de dê ciwan bi defê li kolanan bigerin, di 13’ê Çileyê de dê şeveke bicoş were lidarxistin û di 14’ê Çileyê de jî dê li avahiya komeleyê pîrozbahî bê lidarxistin. Em banga tevlibûnê li tevahiya xelkê Amedê dikin.”