Şîna endamê Hêzên Sûriyeya Demokratîk (HSD) Mehmet Emîn Akman (Seîd Tolhildan) ku di 21'ê Sibata 2019'an de li bajarê Kobanê yê Bakur û Rojhilatê Sûriyeyê di teqînekê de jiyana xwe ji dest da, bi girseyî hat ziyaretkirin. Şîna ku li bajarokê Deştadarê yê navçeya Hezex a Şirnexê hat danîn, bi pêşengiya MEBYA-DER'ê ve bi girseyî hat kirin. Nûnerên partiyên siyasî û rêxistinên girseyî yên demokratîk û gelek kes beşdarî serdanê bûn û gelek caran dirûşmeyên wekî "Şehîd namirin" û "Ey şehîd rêya te rêya me ye" hatin berzkirin.

 

Girseya ku li têketina bajarokê kom bû, ber bi cihê şînê ve meşiya. Piştî rêzgirtinê, rêveberê MEBYA-DER a Hezexê Salîh Acar got: "Şehîd xeta me ya sor in. Em çi bikin bila bikin, em qet nikarin bibin layiqê wan." Hevserokê Partiya Wekhevî û Demokrasiyê ya Gelan (DEM Partî) a Şirnexê Ramazan Ûysal jî got: "Em di Pêvajoya Aştî û Civaka Demokratîk de ne. Îro, ev pêvajo bi saya şehîdan e. Wan Kurd bi cîhanê dan nasîn. Li Rojavayê, Kurd bûn yek. Ev bi têkoşînê çêbû. Em ê di rêya wan de berdewam bikin."

 

'PARASTINA ROJAVAYÊ ERKA ME HEMÛYAN E'

 

Parlamentera DEM Partiyê ya Şirnexê Newroz Ûysal Aslanê jî diyar kir ku Kobanê ji bo hemû mirovahiyê hêvî ye û got: "Saîd Tolhildan yek ji wan kesan bû ku ev hêvî mezin kir. Îro, parastina Rojavayê erka me hemûyan e. Em di Pêvajoya Aştî û Civaka Demokratîk de ne. Piştgiriya vê pêvajoyê tê wateya piştgiriya Rojavayê. Şehîd xeta me ya sor in."

 

Halîme Akmanê, dayika Mehmet Emîn Akman jî got: "Ez hêvî dikim ku ev a dawî be. Ez ê hewl bidim hêjayî kenê ezîzê xwe bim."

 

Serdan piştî xwendina duayan bi dawî bû.